posted by alakhtal3 on أغسطس 18
رسائل عشق
الحب دار .. وحبيب.. وكسوة
وفرش دافي
لو قفلنا علينا بابنا ..محال
تخافي
بس نفتح ليه قلوبنا
يسري دمه في عروقنا..
نبض غالي
وصدقيني
مش هنشبع م الليالي.
الحب موال للحزانى
ناي ف ريح
وصدور عرايا
حكاية مرة
بين شفايف عطشانين
زي ليلة برد قاسية ع الصبايا
زي دمعة فوق خدود الحيرانين
لما ينسى حبيب ويهجر مشتاقين.
الحب صورة من قلوبنا
نور وجنة
رسمه أبدع من فنونا
صدقيني
لو تشوفي الحب زيي
نور وجنة
هتبقي أحلى مما كنتي
ألف مرة
يا للي اليكي قلبي أنا مال
كل محبة وعشرة وشوق وحنان
**
كل ما فرحة تطل علينا
ألقي طيور الهجر تبان!!!
دانت حياتي وعمري وقلبي
ياللي بتدي ودانك للعذال
عمري ما خنتك ، ولا حبيت
غيرك انتي
ياللي اليكي قلبي أنا مال
مرة ما عيني شافت غيرك
ولا غير صوتك قلبي بيسمع
يا للي رموشك ضل حياتي
وسحر عينيكي بحر أيامي
وليل أحلامي
هو مكاني ف قلبك فين ؟
أيوه صحيح القلب قوام يتقلب
بس أنا قلبي ..ساكن فيكي
ساكن روحك ..خاضع ليكي
اوع ف يوم تدي ودانك للعذال
أو تسمعي للي انقال
ياللي اليكي قلبي أنا مال.
الحب وردة شوق وحيرة
شوكها جارح.. بس طارح
ضل عطره في قلوبنا
رمش سارح
رواها قلب نهاره ليله
بس ليه – وانت ماشية -
بتبقي قاسية
وتسيبيني للآلام
ليه عذابك للفؤاد!!!!
ما انت عارفة حجم حبي
ليه وداعك
طعنة جاية بالجراح
ويا السهاد
مرة تانية..وجرح تاني
مش كفاية ..اللي فات!!!
بتقولي خبي من عيوبي
وانت حتة من الفؤاد
مش رح أكتب
أي حاجة عن جراحي
مش رح أكتب غير بحبك
وانت عمري والوداد
وانت عارفة يا مالكة كياني
ان حبك ترنيمة زماني
ان اسمك محفور جوه قلبي
أحلى من كل المعاني
ان رسمك مزروع في عيوني
وصوتك باسمعه أحلى الأغاني
دانت حبك هو شريان الحياة
هو أغلى من أغلى الأماني
لو رجعنا يا حياتي للحياة ،
أوعدك تبقي جوه في عيوني
وندوب سوا ف لحظة جمال
لحظة ترجع لي كياني
دا الهوى ف القلب سارح
والغرام والعشق طارح
وردة ترويها الشفايف
بالعبير تملا زماني
ارجعي تجينا الحياة
واشربي من نبعي تاني
تحلى ف عنينا القصايد
ونملا دنيانا أغاني0
يا أغلى عمر أنا عشته
وأجمل حب صادفته
***
يا نور العين 00 يا ضحكة سن
وحب سنين
ياروح الروح
بشوف طيفك ف نن العين
يزيدني حنين
أحسك نبضة في قلبي
تاخدني لفين
لأحلى حب قابلته
وأجمل عشق صادفته
وأغلى عمر أنا عشته
***
أداري عليك دموع العين
وصبري معاك يا حب سنين
يزيد ف هواك 00 وشوقي اليك
يا خوفي يا قلبي من هجرك
تسهرني 00 تبكيني
تحيرني يانور عيني
أعيش وياك ، وبانسى جفاك
يا ناسيني
واحس معاك كأن الدنيا ف ايديا
تداويني
وانسى معاك دموع عيني
وأعيش وياك وأتاريني
ف أحلى حب قابلته
وأجمل عشق صادفته
وأغلى عمر أنا عشته0
ياااه يا حب ع الهنا
ع الصبايا الحلوه ديه
والسنا
لما ييجي العشق كله
والمنى
أموت أنا
يا أحلى حلم باحلمه
ما أصحاش أنا
يا نجمة عاليه ف السما
يا نسمه حلوة وملهمة
أمسح بعيني دمعتك
وأفدي بعمري دنيتك
مهرك يا حلوة نن عيني
ورموش عينيا مخدتك
دا عمري ليكي مهر غالي
يمكن يزيد ف محبتك
تشاغلني تخايلني
ليالي الشوق وأيامه
وييجي الليل بآلامه
على جراحي يصحيها
أقوم وأصحى..على فرحه
وأنام ليلي وأنا صاحي
أنا باحلم تكون ليا
طبيبي تداوي ف جراحي
وأنا ليكي ..وهارويكي
هاتي لي لي ايديكي ف ايديا
أدوب فيكي وأتاريكي
هنا ف جنبي ..وف عينيا
براح الكون ما هيساعنا
وهاوهب لك نجوم عاليه
يغيب قمري ..تغيب شمسي
تفوتني الدنيا في ثانيه
ما هاحزنشي ولا أسألشي
ما دمتي ساكنة ف عينيا
أشوفك امتى يا عمري
وانتي واقفه على بابي
دا طول البعد دوبني
ومر الهجر وعذابي
دا انا حبي بحور تايهه وماليها
في يوم مرسى ولا مينا
ولا موجة بتهدينا
لشط عينيكي مجدافي
يوصلني لحضنك الدافي
أمل لينا يوافينا
بيوم نحلم يكون صافي
يا ريتك تفهمي قصدي
ياريتك تعرفي ردي
دا عشقك جوه في قلبي
وصورتك ساكنه ف النني
اوعي ف يوم تزعلي مني
ولا تقبلي لحظة تبعدي عني
يا روح الروح ..يا أغلى شيء عندي
أحلىوردة
أمل حياتي .. ونور عيوني
معنى واحد .. أو حتى مية
مش كفاية
ليكي انتي ..يا حياتي
ألف معنى
عمري أهدي .. وقلبي وحدي
يا ملاكي
حاولت أشرح بين سطوري
بعض حبي
حاولت أوضح
رسمت صورة للمحبة
وللأماني
ولو حاولتي هتفهميني
وصدقيني
طبعت قلبي ع السطور
بدون مراوغة
غير ما قلتي
ما انتي عارفه
ان قلبي .. في عيوني
رسمه واضحة
بدون ظلال
عمري ما أعرف ف المراوغة
والضلال
قلبي طيب يا حبيبتي
زي قلبك .. نهر صافي
هو دا رد السؤال.
الحب أنا صنته وعهده
ورويتك من دمع عيوني
وهواي لقيتك بتخونه
ويا ريتك خيبت ظنوني
مش قادر أتخيل انك
من بعد الشوق واللهفة
رح تهجر قلبي ورح تنسى
اهجر وأنا مش هاتشفى
مين غيري رح يدي باخلاص!!
لو حبك ..هيحبك وخلاص
مين بعدي هيصونك ف عيونه!!
أنا وحدي من دون الناس
صدقني لو كنت بتعشق
وبتعرف تدي باخلاص
لتشيلني شيل جوا عيونك
وتبادل قلبي الاحساس
رح اسيبك تتهنى بحبيبك
واداري ع الدنيا سهادك
لا انا هقدر على قسوة قلبك
ولا عمري هاسايرك ف عنادك
يا حبيبي سلمتك أمري
وهاحافظ وحدي على ودادك
وأحلف لك ولا يوم تقابلني
ولا تعرف حالي ف بعادك0
أنساك يا سلام
أنساكي دا كلامك !!
وانتي ساكنة القلب
وف عينيا سهامك
حلفتك بالحبيب
عني لا تغيبي
ولا تتركي قلبي
وتروحي ” يا حبيبي”
دانتي دنيتك هي
قسمتي ونصيبي
والقلب من بعدك
زاد في تعذيبي
والدنيا في بعدك
ناري .. ولهيبي
دانتي دنيتي وقمري
وعذابي .. ونحيبي
ياجنتي وسهري
يا شمسي ومغيبي
لو رحتي يوم عني
وحياتي ما تغيبي
بحبك فوق الخيال والعقل
وأعيشك كل لحظة بشكل
أشوفك دنيتي وعمري
واسلم لك ف الهوى أمري
أسافر وانتي في خيالي
وأرجع وانتي على بالي
وأنام وأحلم بتنهيدتك
وأصحى الصبح على صورتك
يا روح قلبي ونور عيني
فين انتي !! وأنا فيني !!
عشانك أعيش الباقي من عمري
دانتي بقيتي دنيتي وقدري
أخاف اصرح باللي جوايا
وأداري عشقي وهوايا
وأحلم انك يوم تقوليها
وشجرة عمري ترويها
أخبي العشق في قلبي
ويفضحني قلمي .. ما يخبي
بتقولي ان أنا بابعد !!!!
ياعمري الذنب مش ذنبي
لو جيتي تزعلي مني
يدوب القلب في جنبي
أغيب عنك يغيب نظري
ويشكي القلب من صبري
يهون العمر ما تهوني
يا ريتك ماتحرمي عيوني
أشوفك لحظة في حضني
أسمعك مره ف تليفوني
ونرسم للهوى صورة
بريشتك مرة وبريشتي
في ساعة حظ نتلاقى
واعيشك لحظة بجنوني.
أهواكي .. أحبك وأعشقك
أغالط فيكي ظني وأصدقك
أنسى هجرك والفراق
وأعاني ظلمك باحتراق
وأطوي صدري ع العذاب
مهما قلبي فيكي داب
أهواكي .. أحبك وأعشقك
أغالط فيكي ظني وأصدقك
وأسهر ليالي للصباح
وأوصل آلامي بالجراح
أسقي ورودك بالدموع
وأطوي غرامي ف الضلوع
أهواكي .. أحبك وأعشقك
أغالط فيكي ظني وأصدقك
صفار ف وشي من سهر
وألا رعشة قلب باينه ف الايدين؟
فاكره قتلك ليا مره؟
شوفي قلبي تلاقي ليكي
طعنتين
مرة هجرك والدلال
والتانية هي فراق وبين
أرسم حروفك ع الضلوع
وأطوي فؤادي عطش وجوع
أهواكي .. أحبك وأعشقك
أغالط فيكي ظني وأصدقك
|
الحب تفعيلة ف قصيدة نظرة هايمة..وابتسامة كلمة حلوة .. لو نقولها ألف مرة نبني بيتنا والقصيدة ..قصر عالي يكفي شوقنا صدقيني الحب نعمة ورح تكوني حتة مني وقلبي ليكي |
 vbrep_register(“218052″)  |
